Son yeniləmə: 26 May 2021 10:31
Bayraqdar.info – Azərbaycan Gimnastika Federasiyasının (AGF) 2021-ci ildə təşkil edəcəyi ən irimiqyaslı yarış aerobika gimnastikası üzrə dünya çempionatı olacaq.
Ölkəmizin ilk dəfə ev sahibliyi edəcəyi yarış mayın 27-29-da keçiriləcək.
Məlumat Azərbaycan Milli Gimnastika Federasiyasından verilib.
Məlumatda deyilir ki, bu növ üzrə Avropa çempionatı isə ilk dəfə olaraq 2019-cu ildə təşkil edilib.
Milli Gimnastika Arenası bu dəfə dünya çempionatı zamanı gimnastikanın ən dinamik növünün nümayəndələri üçün öz qapılarını açmağa hazırlaşır.
İlkin qeydiyyat siyahısına əsasən, yarışda 22 ölkədən 171 idmançının iştirakı gözlənilir.
Federasiyadan bildirilib ki, üç gün davam edəcək çempionatda gimnastlar fərdi qadın və kişi, qarışıq cütlük, üçlük, qrup, həmçinin aero dans və aero step proqramlarında yarışacaqlar. Qaydalara əsasən, bir iştirakçı bu kateqoriyaların maksimum üçündə çıxış edə biləcək. Çempionatda hər bir kateqoriya üzrə təsnifat və final mərhələləri baş tutacaq.
