Bayraqdar.info – Mayın 19-da futbol üzrə Azərbaycan Premyer Liqasının 2020-2021-ci il mövsümünə yekun vurulacaq.
Sonuncu – 28-ci turun görüşlərinin nəticələrinə əsasən çempion və digər mükafatçılar müəyyənləşəcək.
Bu barədə Azərbaycan Premyer Liqasından xəbər verilib.
Xəbərdə bildirilir ki, günün ilk üç oyunu eyni vaxtda başlayacaq. Mövsümə çempionluq uğrunda mübarizə aparan iki komanda “Neftçi” – “Qarabağ” görüşü ilə yekun vurulacaq.
“Bürünc medala iddialı “Sumqayıt” klubu “Səbail”in qonağı olacaq. Ayxan Abbasovun baş məşqçi olduğu komanda üçüncü yerdəki “Zirə”dən iki xal geridədir. “Səbail” isə 24 xalla yeddincidir”, – deyə Liqadan xəbər verilib.
Bayraqdar.info-nun məlumatına görə, komandalar indiyədək Premyer Liqada 13 dəfə üz-üzə gəlib. Bu görüşlərin 6-da qonaqlar, 5-də paytaxt klubu qələbə qazanıb. Top fərqində də “Sumqayıt” üstündür – 14:12. Rəqiblər arasındakı son 6 aoyunda ən azı iki qol vurulub.
“Bürünc medallara iddialı olan digər komanda “Zirə” səfərdə “Sabah”la qarşılaşacaq. Rəşad Sadıqovun baş məşqçi olduğu komanda hazırda 38 xalla üçüncü sıradadır. “Sabah” isə 26 xalla beşincidir. “Zirə” avrokuboklara vəsiqə verən üçüncü pillədəki yerini qorumaq üçün bu oyunda qalib gəlməlidir.
“Digər oyunda Premyer Liqanın autsayderi “Keşlə” klubu “Qəbələ”ni qəbul edəcək. Əvvəlki 50 qarşılaşmanın 18-də “Keşlə”, 14-də isə “Qəbələ” qələbə qazanıb. Top fərqində də meydan sahibləri aşkar üstündürlər – 65:50. “Qəbələ” son 6 qarşılaşmada yalnız bir dəfə qalib gəlib”, – deyə xəbərdə bildirilir.
Xəbərdə vurğulanır ki, nəhayət, günün əsas oyununda “Neftçi” komandası “Qarabağ”la üz-üzə gələcək. Paytaxt təmsilçisi sonuncu tura qədər 56, Ağdam klubu isə 57 xal toplaya bilib.
Rəqiblər indiyədək ölkə çempionatlarında 82 dəfə üz-üzə gəliblər. Bunların 30-da “Qarabağ”, 22-də isə “Neftçi” qələbə qazanıb. Topların fərqində də əyalət təmsilçisinin üslünlüyü var – 92:75. Qurban Qurbanovun baş məşqçi olduğu komanda son üç oyunda rəqibinə qol vurub. “Neftçi” isə son üç səfər oyununda uduzmayıb.
Bayraqdar.info Liqaya istinadla bildirir ki, “Səbail”–“Sumqayıt”, “Sabah”–“Zirə” və “Keşlə”–“Qəbələ” oyunları 18:00-da başlayacaq. Çempionun müəyyənləşəcəyi “Neftçi”–“Qarabağ” görüşü isə saat 20:30-da başlayır.
