Bayraqdar.info – 2020-2021-ci tədris ili üzrə Respublika fənn olimpiadaları final turunun vaxtı müəyyənləşib.
Mayın 31-də Azərbaycan dili və ədəbiyyat, tarix, coğrafiya fənləri üzrə olimpiada yarışları keçiriləcək.
İyunun 1-də riyaziyyat, fizika fənləri, iyunun 4-də isə kimya, biologiya və informatika fənləri üzrə olimpiadanın keçirilməsi nəzərdə tutulur.
Bu barədə Bayraqdar.info-ya Təhsil Nazirliyindən bildirilib.
“Respublika mərhələsinin yarımfinal turunun nəticələrinə əsasən, ümumilikdə 589 şagird final turunda iştirak edəcək. Final turunda iştirak edəcək şagirdlər mayın 20-25-də qeydiyyatdan keçməli və müvafiq buraxılış vərəqəsini əldə etməlidirlər. Qeyd edək ki, Respublika fənn olimpiadaları “Kapital Bank”ın sponsorluğu ilə keçirilir”, – deyə Nazirliyin xəbərində qeyd edilib.
