Son yeniləmə: 17 May 2021 11:40
Byraqdar.info – Dövlət İmtahan Mərkəzi (DİM) tərəfindən mayın 20-də tədris Azərbaycan dilindən fərqli dillərdə aparılan ümumi təhsil müəssisələrinin IX və XI sinif şagirdləri üçün Azərbaycan dili (dövlət dili kimi) fənnindən buraxılış imtahanı keçiriləcək.
DİM-dən bildirilib ki, imtahan ümumilikdə 21 şəhər və rayonda, 88 binada aparılacaq.
İmtahan bütün binalarda eyni vaxtda – saat 11.00-da başlanır. Saat 10.45-də buraxılış rejimi başa çatır. Bundan sonra gələn iştirakçılar imtahan binasına buraxılmır. İştirakçılar imtahana buraxılış vərəqəsini DİM-in saytından çap edib götürə bilərlər.
Mərkəzin xəbərində deyilir ki, “Şagirdlər imtahana aşağıdakı sənədləri gətirməlidir: buraxılış vərəqəsi, “İmtahan iştirakçısının sağlamlığı haqqında bəyannamə” (Bəyannamə DİM-in saytından buraxılış vərəqəsi ilə bir yerdə çap olunur və şagird tərəfindən imzalanır. Bəyannaməni imtahan nəzarətçisinə təhvil vermək lazımdır), şəxsiyyəti təsdiq edən sənədin əsli”.
Sənədlərə diqqət
Azərbaycan vətəndaşları (16 yaşı tamam olmayan şagirdlər də daxil olmaqla) şəxsiyyət vəsiqəsini, əcnəbilər və vətəndaşlığı olmayan şəxslər Dövlət Miqrasiya Xidməti tərəfindən verilmiş icazə vəsiqələrini, qaçqın statusu almış xarici vətəndaşlar və onların ailə üzvləri isə qaçqın vəsiqələrini imtahana gələrkən özləri ilə gətirməlidirlər.
“Şəxsiyyət vəsiqəsində şəkli olmayan şagirdlər digər sənədlərlə yanaşı təhsil müəssisəsi tərəfindən verilmiş və fotoşəkilləri yapışdırılmış arayışı (arayışa şagirdin 3×4 sm ölçülü şəkli yapışdırılır və şəkil möhürlə təsdiqlənir) təqdim etməlidirlər. Xatırladaq ki, hər iki imtahanda şagirdlərə 30 qapalı tipli test tapşırığı təqdim edilir. Səhv cavablar yekun bala təsir göstərmir. İmtahan iştirakçılarının toplaya biləcəkləri maksimal bal 100-dür. Bu imtahanın nəticəsi şagirdin yekun attestasiya sənədinə yazılacaq”, – deyə DİM bildirir.
50 və daha yuxarı bal “məqbul” sayılacaq
Bayraqdar.info-nun verdiyi xəbərə görə, Mərkəzdən onu da qeyd ediblər ki, ali və ya orta ixtisas təhsili müəssisələrinə qəbul olmaq üçün abituriyentlərin balı 50 və daha yuxarı olduqda “məqbul” qiymət almış hesab olunurlar. İmtahan 45 dəqiqə müddətində aparılacaq.
“İmtahanda ümumilikdə 17 min 987 (Bakıda 11 min 844, Sumqayıtda 666, Abşeronda 558, Naxçıvanda 70, Gəncədə 1 min 163, Şəmkirdə 105, Tovuzda 193, Mingəçevirdə 197, Yevlaxda 116, Şəkidə 102, Zaqatalada 265, Balakəndə 210, Qəbələdə 216, Qaxda 203, Bərdədə 185, Göyçayda 233, Şirvanda 281, Lənkəranda 304, Qubada 167, Qusarda 372, Xaçmazda 537) şagirdin iştirakı nəzərdə tutulur.
İmtahanın idarə olunması üçün 88 ümumi imtahan rəhbəri, 226 imtahan rəhbəri, 1 min 690 nəzarətçi-müəllim cəlb edilib, 176 buraxılış rejimi əməkdaşı (mühafizə), 88 bina nümayəndəsi ayrılıb”, – deyə DİM xəbər verir.
