Son yeniləmə: 16 May 2021 10:25
Bayraqdar.info – Prezident, Silahlı Qüvvələrin Ali Baş Komandanı İlham Əliyevin təsdiq etdiyi plana əsasən mayın 16-dan Azərbaycan Ordusunda qoşun növlərinin cəlb edilməsi ilə təlimlər keçirilir.
Bu məlumatı Müdafiə Nazirlyi yayıb.
Məlumatda bildirilir ki, təlimə 15 min nəfərədək şəxsi heyət, 300-dək tank və digər zirehli texnika, 400-dək müxtəlif çaplı raket və artilleriya qurğusu cəlb edilib. Həmçinin, yaylım atəşli reaktiv sistemləri, minaatan və tank əleyhinə vasitələr, 50-dək hərbi aviasiya və müxtəlif təyinatlı pilotsuz uçuş aparatları da təlimlərdə iştirak edir.
“Bu təlimlərdə Vətən müharibəsində qazanılan döyüş təcrübəsi nəzərə alınmaqla əsas diqqət qoşunların idarə olunması, döyüşə hazır olma vəziyyətinə gətirilməsi və yenidən qruplaşmasına yönəlib. O cümlədən ümumqoşun birlikləri, raket və artilleriya qoşunları, aviasiya, xüsusi təyinatlı qüvvələr arasında döyüş uzlaşması və qarşılıqlı fəaliyyətin təkmilləşdirilməsi də əsas diqqət hədəfindədir”, – deyə məlumatda bildirilir.
Eyni zamanda o da qeyd edilib ki, mayın 20-dək davam edəcək təlimlərdə qoşunlar qanunsuz silahlı qruplaşmaların təxribatlarının qarşısını almaq və əks fəaliyyətlə terrorçuların zərərsizləşdirilməsi üzrə tapşırıqları da icra edəcək.
