Bayraqdar.info – Qubada fəaliyyət göstərən “Qafqaz” TV yeni layihəyə imza atıb.
TV-dən bayraqdar.info-ya verilən bilgiyə görə, ayda bir dəfə “Çölçü” obasında “Çölçü göstərisi” təşkil ediləcək.
Layihədə əsasən elm, sənət və biznes sahəsindən yenilikçi, yaradıcı və qurucu adamları cağırıb bir-biri ilə tanış etmək nəzərdə tutulur. Elmi işə başlayanlar, işində yenilik edənlər obaya gəlib izləyicilərlə işlərini paylaşacaq, özlərini tanıdacaqlar.
“Qafqaz” TV-nin prezidenti Eltən Qədimbəyli deyir ki, “Çölçü göstərisi” Azərbaycandakı yaradıcı adamlar üçün əvəzedilməz bir yer olacaq. Onlar hər kəsdən fərqli olaraq təbiətin içində öz işlərini göstərmək üçün bir yer tapmış olacaqlar.
Layihəyə görə, “Çölçü göstərisi” platformasında özünü tanıtmaq istəyənlər əvvəlcədən özləri və fəaliyyətləri barədə məlumatları TV-yə təqdim etməlidir. Daha sonra onlar çıxışçı kimi Obaya dəvət ediləcəklər.
TV ən bacarıqlı çıxışçıları seçib izləyicilərlə görüşdürəcək. Obaya tək özünü tanıtmaq üçün deyil, həm də başqalarını tanıtmaq üçün izləyici kimi də qatılmaq olar. İzləyici kimi iştirak etmək üçün ödəniş etmək lazım gələcək.
TV prezidenti bildirir ki, öncədən görüşün vaxtı sosial səhifələrdə paylaşılacaq, ödəniş iştirakçı şəxsin yol xərci, yemək xərci üçün istifadə ediləcək, eyni zamanda iştirakçı yeni tanışlıqlar əldə edəcək.
“Şirkət və qurumlar layihəyə dəstəkçi kimi qoşula bilər. Belə olduqda, onların tanıtım lövhələri Obada yerləşdiriləcək. Verilişlər bir neçə kamerayla çəkilib yayımlanacaq. Göstərilərə Azərbaycannın iş adamları, biznes təlimçiləri və tanınmış şəxslər dəvət ediləcək. Startapçılar, şairlər, musiqiçilər öz yaradıcılıqlarını təbiətin qoynunda daha rahat formada tanıda biləcəklər”, – deyə telekanaldan bildirilib.
TV rəhbəri “Çölçü göstərisi”nə qatılmağın rəngli, işıqlı adamlarla tanışlıq demək olduğunu diqqətə çatdırır: “Obada həm də müxtəlif oyunlar təşkil ediləcək ki, yaradıcı insanlar da həmin oyunlarla tanış ola biləcək. Son zamanlar pandemiya dövründə yaranan neqativ psixoloji məqamları aradan qaldırmaq üçün ən gözəl iş – təbiətdə “Çölçü göstərisi”nə qatılmağı təklif edirik”.
Daha sonra “Çölçü göstərisi” verilişlərində iştirak etmək istəyən çıxışçı və iştirakçıların Qafqaz TV və “Çölçü klubu” səhifələrinə müraciət edə biləcəkləri də nəzərə çatdırılır.
