Son yeniləmə: 6 May 2021 10:34
Bayraqdar.info – Bugünlərdə sevilən müğənni, Azərbaycanla yanaşı Qırğızıstanda da yaxşı tanınan körpü-adam Aslan Hüseynovun ölüm xəbəri hər kəsi üzdü. Anasının ölümünün ardından Gəncəyə gedən, oradan Bakıya qayıdarkən yolda avtomobil qəzası keçirən və həlak olan Aslanın ölümü ölkə xaricində də dərin üzüntüyə səbəb oldu.
Bayraqdar.info-ya Qırğızıstandakı Azərbaycanlılardan bu münasibətlə təziyə açıqlaması daxil olub:
“Ulu Türküstan – indiki Orta Asiya ictimaiyyətinə ağır itki üz verib. İki gündür onu tanıyanlar şok yaşayır. İlk anlarda heç kim “yol canavarının” aldığı canın Aslan Hüseynov olduğuna inanmaq istəmirdi. Amma bu, gerçək və üzücü, kədərli bir xəbər idi.
Tez bir zamanda Aslanın doğulub orta təhsilini aldığı Qazaxıstanın Cambul vilayətinin Yeni Yol kəndini, sonralar köçdüyü Qırğızıstanın paytaxtı Bişkeki və ən nəhayət ailəsi ilə birlikdə daimi məskən seçdiyi tarixi vətəni Azərbaycanı sarsıtdı ölüm xəbəri…
Ömrünün ən müdrik, ən gözəl, çiçəklənən bahar çağında gözlərini əbədi olaraq yumdu Aslan… Çox heyfsiləndik, ürəkdən acıdıq avtoqəza nəticəsində həyatını itirməyinə…
Aslanı yaxşı tanıdığımız və xasiyyətinə bələd olduğumuz üçün, onun nə qədər hay-küylü, sözü üzə deyən, deyib gülən, dostlarına sədaqətli, yaxınlarını sevən və özünü sevdirən olduğunu deyə bilərik…
Qırğızıstanda, eləcə də Azərbaycanda qısa bir müddət ərzində insanlara, eləcə də tamaşaçı kəsiminə özünü sevdirə bilmiş, qəlblərdə özünə yer tapmışdı.
Onun ölüm xəbəri nəinki soydaşlarımız, eləcə də başqa millətlərin nümayəndələri tərəfindən çox təəssüf hissiylə qarşılandı. Axı Aslanın Azərbaycan dilindən başqa bir çox digər xalqların dillərində ifaları da çoxminli tamaşaçı kəsiminin qəlbinə yol tapmışdı.
Onun ölüm xəbəri yayılar-yayılmaz diaspora rəhbərliyinə, Türkel redaksiyasına telefon açaraq bu məlumatın doğru olub-olmadığını dəqiqləşdirmək istəyənlərin sayı-hesabı yoxuydu. Bu acı xəbərlə razılaşanlar da Aslanın yaxınlarına başsağlığı verməmizi istədilər.
Bəli, Aslan artıq aramızda yoxdur… Ancaq onun şən, şaqraq, sevimli mahnıları və əziz xatirəsi unudulmayacaq.
Aslandan bir həftə öncə dünyasını dəyişən anası Fatma xanıma da Allahdan rəhmət diləyirik.
Aslanın ailəsinə və yaxınlarına başınız sağ olsun, son qəminiz olsun deyirik.
Allah rəhmət eləsin! Məkanı cənnət olsun!
Əzizağa Əliyev – Qırğızıstandakı “Azəri” İctimai Birliyinin sədri, əməkdar hüquqşünas,
Hökümə Xəlilova – Media Türkel prezidenti
Ramiz Məşədihəsənli – Media Türkel baş redaktoru”
