Bayraqdar.info – “Bu ilin mart ayında Kiçik və Orta Biznesin İnkişafı Agentliyinin (KOBİA) KOB inkişaf mərkəzləri (KOBİM-lər) tərəfindən mikro, kiçik və orta biznes (KOB) subyektləri, startaplar və biznesə başlamaq istəyənlər üçün müxtəlif mövzularda və əsasən onlayn formatda olmaqla 47 təlim təşkil edilib. Vergi, korporativ idarəetmə, rəqəmsal marketinq, satış, maliyyə mənbələrinə çıxış, sığorta, layihələrin və biznes planın hazırlanması və s. istiqamətləri əhatə edən təlimlərdən 1200-ə yaxın sahibkar və biznesə başlamaq istəyənlər yararlanıb. Bunlardan 500-ə yaxını gənclər, 600-ə yaxını isə qadınlardır.”
Bu açıqlamanı aprelin 19-da Kiçik və Orta Biznesin İnkişafı Agentliyi (KOBİA) yayıb.
Məlumatda bildirilir ki, ötən ay KOBİM-lərin peşəkar ekspertləri tərəfindən 70-ə yaxın sahibkara və biznes assosiasiyasına müxtəlif istiqamətlər üzrə məsləhət xidmətləri göstərilib. Mart ayında KOBİM-lərin dəstəyi ilə kino və video çəkiliş studiyasının yaradılması, reklam fəaliyyəti, landşaft dizayn xidmətləri, konsaltinq və s. sahələrdə bir sıra yeni sahibkarlıq subyektləri yaradılıb.
Ümumilikdə mart ayında daha çox biznes planın və layihələrin hazırlanması, büdcə tərtibatı, satış və marketinq üzrə məsləhət və təlim xidmətləri üçün KOBİM-lərə müraciət ediblər”, – deyə KOBİA-nın açıqlamasında qeyd edilir.
Daha sonra açıqlamada qeyd edilib ki, KOBİM-lərin xidmətlərindən istifadə edən sahibkarlar həm də biznes layihələrinin reallaşdırılması və sahibkarlıq fəaliyyətlərinin inkişaf etdirilməsi üçün maliyyə resurslarına çıxışla bağlı məlumatlandırılıb, dövlətin güzəştli kreditləri və digər maliyyə dəstəyi mexanizmlərindən yararlanması üçün müvafiq qurumlara yönləndirilib. Eyni zamanda, öz təsərrüfatını qurmaq istəyən potensial sahibkarlar müvafiq texnika və avadanlıqlarla təmin olunması üçün özünüməşğulluq proqramı ilə əlaqələndirilib.
“Məlumat üçün bildirək ki, KOBİA-nın hazırda Bakı, Sumqayıt, Xaçmaz, Şəki və Yevlax şəhərlərində 5 KOB inkişaf mərkəzi fəaliyyət göstərir. KOBİM-lər tərəfindən göstərilən bütün xidmətlər ödənişsizdir”, – deyə açıqlamada bildirilir.
