“Ermənistana olan ən böyük təhlükə özlərinin psixologiyasıdır. Bu, dəyişməlidir və bəlkə o zaman bizim onlara verdiyimiz çox ağrılı dərs reallığı dərk etmək üçün dönüş nöqtəsi olacaq. Onlar anlamalıdırlar ki, əgər sən özünü müstəqil ölkə adlandırırsansa, o zaman xalqının qüruru sənin əlindədir və sən xalqını müdafiə etməlisən. Bu gün Rusiya və Belarus arasında ittifaq dövlətləri münasibətləri var. Bildiyim qədər bu gün Ermənistanda bəziləri bu haqda danışırlar. O zaman bayraqlarını endirsinlər, başqa ölkənin quberniyasına çevrilsinlər və həmin ölkə onları qorusun.”
Bu fikirləri Azərbaycan Respublikasının Prezidenti İlham Əliyev aprelin 13-də ADA Universitetində keçirilən “Cənubi Qafqaza yeni baxış: münaqişədən sonra inkişaf və əməkdaşlıq” adlı beynəlxalq konfransda ABŞ-ın Prinston Universitetinin dosenti Maykl Reynoldzun sualını cavablandırarkən səsləndirib. Ekspertlər də təsdiqləyərlər ki, İlham Əliyev, əslində analitik mərkəzlərin böyük həcmli araşdırmalarına, genişmiqyaslı təhlillərinə mövzu olacaq fikirləri cəmi altı cümlədə, özü də səlis, sərrast və diplomatikcəsinə bütün dünyanın diqqətinə çatdırdı. Yəni, Azərbaycan Prezidenti yuxarıdakı altı cümlədə Ermənistanın necə bir dövlət olmasını, bu dövlət üçün ən böyük təhlükənin xaricdən deyil, daxildən qaynaqlandığını, daha dəqiq desək, Ermənistanın hələ də müstəqil, qürurlu dövlət ola bilmədiyini bütün dünyaya çatdırdı. Dövlət başçısı eyni zamanda, nicatı özündə, daxilində deyil, xaricdə axtarmağın aqibətinin də necə acınacaqlı ola biləcəyini bəyan etdi: “O zaman bayraqlarını endirsinlər, başqa ölkənin quberniyasına çevrilsinlər və həmin ölkə onları qorusun”.
Beləliklə, dünyanın aparıcı beyin mərkəzləri nümayəndələrinin, öz ölkələrində və dünyada politoloji fikrə, ictimai rəyə təsir edən nüfuzlu şəxslərin iştirakı ilə keçirilən bu beynəlxalq konfrans Prezident İlham Əliyevin mühüm mesajları ilə yadda qaldı.
Bu mesajların ümumi dəyərləndirilməsinə keçməzdən öncə beynəlxalq kofransda Ermənistanın işğalçılıq siyasəti, həmçinin yeni ərazi iddiaları ilə bağlı məqama toxunan dövlət başçısının, “Bəli, onlar Dağlıq Qarabağı müstəqil dövlət adlandırdılar, növbəti mərhələdə yeni xəritələr çap etdilər və bütün ətraf rayonlarımızı Dağlıq Qarabağ adlandırmağa başladılar. Şəhər və kəndlərimizin adları dəyişdirildi və nəhayət, bizi yeni ərazilər uğrunda yeni müharibə ilə hədələməyə başladılar. Bunu deyən onların Tonoyan soyadlı müdafiə naziri idi. O bəyan etmişdi ki, Ermənistan yeni ərazilər uğrunda yeni müharibəyə hazırlaşır. Biz köhnə torpaqlar uğrunda yeni müharibənin necə olduğunu onlara göstərdik. Tonoyan isə işdən qovuldu. Bu, bizimlə bu tərzdə danışa biləcəyini hesab edən hər kəsə dərsdir. Biz müharibə zamanı lazım olanı etdik”, sözlərini xüsusi olaraq vurğulamağı vacib sayırıq. Çünki bu sözlər istər işğalçı ölkəyə və oradakı revanşıst qüvvələrə, istərsə də Ermənistanın xarici havadarlarına növbəti xəbərdarlıq kimi dəyərləndirilə bilər.
Ümumiyyətlə isə Prezident İlham Əliyevin konfransda regionda baş verən proseslər və dövlətimizin mövqeyi ilə bağlı verdiyi mühüm mesajlar Azərbaycan həqiqətlərinin, o cümlədən ölkəmizin 44 günlük müharibədə qazandığı şanlı qələbə sayəsində regionda yaranan yeni reallıqların dünya ictimaiyyətinin diqqətinə çatdırılması baxımından böyük önəm daşıyır. Bu, eyni zamanda məqsədyönlü siyasət sayəsində qısa müddətdə ermənilərin qlobal informasiya məkanında yaratdıqları mifləri dağıtmağa nail olan Azərbaycanın və dövlət başçımızın postmüharibə dövründə də sözügedən istiqamətdə inamla addımlamaqda israrlı olduğuna işarə edir.
Xatırlatmaq yerinə düşər ki, Azərbaycan Prezidenti İlham Əliyevin Vətən müharibəsi dövründə dünyanın 30-dan çox aparıcı media orqanına müsahibələri, çıxışları, bəyanatları beynəlxalq aləmin diqqət mərkəzində olmaqla yanaşı, dövlət başçımızın müharibəni həm döyüş meydanında, həm də informasiya cəbhəsində apardığının əyani sübutu idi. Həm bunlar, həm müharibədən əvvəl və sonra mühüm beynəlxalq platformalarda nitqləri, müzakirələrdə iştirakı, həm də şanlı Zəfərdən sonra xarici jurnalistlərlə 4 saatlıq mətbuat konfransı və aprelin 13-də dünyanın aparıcı beyin mərkəzlərinin nümayəndələri ilə görüşü aydın göstərir ki, Prezident İlham Əliyev təkcə dövlət idarəçiliyi, daxili və xarici siyasət məsələlərinə deyil, həm də dövlətin informasiya siyasətinə yeni strateji baxış nümayiş etdirir. Əksər ekspertlərin vurğuladıqları kimi Prezident İlham Əliyevin yeni informasiya strategiyası şəffaflıq, obyektivlik, sistemlilik, operativlik kimi prinsiplərə əsaslanır, milli maraqların müdafiəsi, ölkə həqiqətlərinin müasir üslubda dünya ictimaiyyətinə çatdırılması, cəmiyyətin hərtərəfli məlumatlandırılması, ictimai rəyə hörmət kimi mühüm amillər üzərində qurulub. Heç şübhəsiz, bu məqamda Azərbaycan Prezidentinin müzakirə və debatlarda, mətbuat konfranslarında ən mürəkkəb suallara açıqlığı və onları peşəkar formada cavablandırmaq bacarığı xüsusi vurğulanır. Bu məqamların üzərində xüsusi olaraq dayanan ekspertlər dövlət başçımızın yüksək məntiqini, intellektini, diplomatik məharətini, dünyada, regionumuzda və ölkəmizdə baş verən hadisələr və cərəyan edən proseslər barədə tam məlumatlılığını, elmi-politoloji biliyini yüksək qiymətləndirir və Prezident İlham Əliyevin dünya səviyyəli siyasətçi olduğunu bildirirlər.
Məhz bu keyfiyyətlər fonunda müharibə dövründə və münaqişədən sonrakı mərhələdə Azərbaycan Prezidentinin informasiya sahəsində fəaliyyəti Ermənistan və erməni lobbisinin, Azərbaycanı istəməyən xarici qüvvələrin ölkəmizə qarşı ünvanladığı yalan və böhtanların ifşa edilməsi ilə yanaşı, mövcud reallıqlarla bağlı beynəlxalq ictimaiyyətin obyektiv məlumatlandırılmasında mühüm rol oynadı və hazırda da oynayır. Məhz bu baxımdan Prezident İlham Əliyevin yenə də bəhs edilən konfransda sualı cavablandırarkən bəyan etdiyi aşağıdakı fikirlər də xarici auditoriyanın həqiqətləri bilməsi baxımından önəmlidir: “Anlayıram ki, bəzi azərbaycanlıların Ermənistan ərazisinin bir hissəsinin qədim Azərbaycan torpağı olması fikrini səsləndirdiklərini çox diplomatik şəkildə təqdim etdiniz. Yəqin ki, siz burada məni nəzərdə tutursunuz. Mən bunu başa düşürəm və olduqca nəzakətli davranışınıza görə təşəkkür edirəm. Bu sualı verdiyinizə görə də sizə təşəkkür edirəm. Çünki bu mövzu da Ermənistanda siyasi manipulyasiya məqsədlərində istifadə edilir. Yəni, mənim ərazi iddialarım var. Xeyr, bu, belə deyil və mən bunu ictimai şəkildə bəyan edirəm. Lakin, eyni zamanda, biz tarixi bilməliyik. Mən gənc nəsillə bağlı dediklərinizlə də razılaşıram ki, bəzən gənc nəsil tarixi bilmir. Hətta bizim nəslə belə saxta tarix öyrədilib. Mən məktəbdə təhsil alarkən bizə qəhrəman kimi təqdim edilənlər, əslində, cinayətkarlar idi. Məsələn, Azərbaycan xalqını qətlə yetirən 26 Bakı komissarı. Bizi öyrədirdilər ki, onlar qəhrəman idilər və vətənimizi xilas etmişdilər. Əslində isə Şaumyan və digərləri cinayətkar idilər. Onlar burada qırğınlar törədib, azərbaycanlıları qətlə yetiriblər. Belə nümunələr çoxdur. Beləliklə, biz bu nəslin reallıqlardan bixəbər olmasını istəmirik. Mən deyəndə ki, Zəngəzur qədim Azərbaycan torpağıdır, bu, həqiqətdir. Zəngəzur 1920-ci ildə Ermənistana verilmişdir – 101 il əvvəl. Ondan əvvəl o torpaq bizə məxsus idi. Onların bu gün Sevan adlandırdığı Göyçə gölünün ətrafında azərbaycanlılar yaşayıblar. Bu da bir həqiqətdir. XX əsrin əvvəlindəki xəritələrə baxsanız Sevan deyil, Göyçəni taparsınız. İrəvanla bağlı da məsələ eynidir. Onlar İrəvanın tarixi hissəsini məhv ediblər. Bunlar hamısı faktlardır. Azərbaycanlılar orada yaşamışlar, o cümlədən mənim ulu babalarım. Bunlar hamısı faktlardır, lakin bizim ərazi iddiasında olmağımız anlamına gəlməməlidir. Bilmirəm, bunu eşitmisiniz, yoxsa yox, mən demişəm ki, biz oraya qayıdacağıq. Ancaq mən demədim ki, biz oraya tank üzərində qayıdacağıq. Biz Zəngəzur dəhlizinə qayıdıb orada yoldan istifadə edəcəyiksə, niyə biz İrəvana qayıtmayaq? Hesab edirəm ki, vaxtı gələndə biz bunu da edəcəyik. Bir daha bu suala görə təşəkkür edirəm. Bu sual məsələyə aydınlıq gətirməyə və öz mövqeyimi ortaya qoymağa imkan yaratdı. Biz tariximizi yadda saxlayacağıq, ancaq Ermənistan da daxil olmaqla, heç bir ölkəyə qarşı ərazi iddiamız yoxdur”.
Sonda vurğulayaq ki, Azərbaycan Prezidentinin bu fikirləri təkcə beynəlxalq ictimaiyyətə ünvanlanmış bir mesaj kimi dəyərləndirilməməlidir. Bu fikirlər eyni zamanda Azərbaycan gəncliyinə Prezident tövsiyyəsi oldu ki, onlar tariximizi heç vaxt unutmasınlar. Çünki ötən müddət ərzində cərəyan edənlərin fonunda 44 günlük Vətən müharibəsinin şanlı Zəfərlə başa çatmasının başlıca səbəblərindən biri də məhz Azərbaycan xalqının öz tarixini unutmaması, öz torpağına sahib çıxmaq istəyi oldu.
