Bayraqdar.info – Xarici İşlər Nazirliyi Mətbuat xidmətinin rəhbəri Leyla Abdullayeva medianın Ermənistan XİN nümayəndəsinin Azərbaycan Respublikasının dövlət başçısının fikirlərinə şərhi ilə bağlı suallarını cavablandırıb. Cavabı təqdim edirik:
“Ermənistan XİN-in nümayiş etdirdiyi yanaşma heç bir təəccüb doğurmur, çünki bu əsassız iddialar ənənəvi olaraq rəsmi Yerevan tərəfindən səsləndirilir. Əfsuslar olsun ki, Ermənistan tərəfi hər zaman olduğu kimi, eşitdiklərini fərqli şəkildə yozmaqla məşğuldur.
Azərbaycana qarşı ərazi iddiaları ilə çıxış edən Ermənistan, Azərbaycan rəsmiləri tərəfindən səsləndirilən fikirlərdə də bu kimi məqamlar axtarmağa çalışır.
Məlum olduğu kimi, məhz Ermənistan beynəlxalq hüququn dövlətlərin suverenliyi, ərazi bütövlüyü və beynəlxalq sərhədlərinin toxunulmazlığı prinsiplərinə qarşı çıxış edərək uzun illər ərzində Azərbaycana qarşı işğalçılıq siyasəti həyata keçirib. Əksinə, Azərbaycan beynəlxalq hüququn sözügedən prinsipləri əsasında ikitərəfli münasibətlərin normallaşdırılmasının tərəfdarıdır və hər zaman bu mövqedən çıxış edib.
Tarixi özlərinin güclü tərəfi kimi qələmə verməyə çalışan Ermənistan yenə də tarixlə mifologiyanı qarışıq salır. Elə bu səbəbdən də illərdir ki, erməni xalqını bu yalan və miflərin girovuna çeviriblər.
Rəsmi Yerevan bu həqiqəti nə qədər tez anlayarsa, erməni xalqı bir o qədər tez bölgədə dayanıqlı sülh və təhlükəsizlikdən faydalana bilər”.
Qeyd edək ki, Prezident İlham Əliyevin bir neçə gün öncə Hərbi Qənimətlər Parkının açılışını gerçəkləşdirməsi, növbəti gün isə dünyanın beyin mərkəzləri nümayəndələri ilə geniş müzakirəsi Ermənistanda yenidən təlatümlərə səbəb olub. Ona görə də rəsmi İrəvan vəziyyətdən çıxmaq üçün hər zamankı kimi absurd bəyanatlarla Azərbaycanın üzərinə gəlməyə çalışır. Təbii ki, bəyanatları absurd olduğu üçün hər hansı yüngül tənqidə belə davam gətirə bilmir.
