Yücel Karauz: Hərbi Qənimətlər Parkı Azərbaycan dövlətinin, xalqının və ordusunun Vətən müharibəsindəki qəhrəmanlığının abidəsidir
Bayraqdar.info – “Aprelin 12-də Bakıda Hərbi Qənimətlər Parkının açılışı tarixi hadisədir. Hesab edirəm ki, Park Azərbaycan dövlətinin, xalqının və ordusunun Vətən müharibəsindəki qəhrəmanlığının abidəsi olaraq bu şanlı Zəfər haqqında həqiqətlərin gələcək nəsillərə də çatdırılması baxımdan mühüm rol oyanayacaq.”
Bunu Bayraqdar.info-ya açıqlamasında Türkiyə Cümhuriyyətinin Azərbaycandakı keçmiş hərbi attaşesi, Türkiyə Ordusunun ehtiyatda olan generalı Yücel Karauz deyib. Türkiyəli general öncə onu deyib ki, açılış mərasimində Vətən müharibəsində qəhrəmancasına həlak olmuş şəhidlərin əziz xatirəsinin yad edilməsinin, həmçinin müharibədə qəhrəmanlıqlar göstərən hərbçilərə Azərbaycan dövlətinin yüksək hərbi mükafatları olan “Vətən müharibəsi qəhrəmanı” ulduzu, “Zəfər” və “Qarabağ” ordenlərinin təqdim edilməsinin xüsusi rəmzi mənası var: “Bu, cənab Prezident, Ali Baş Komandan İlham Əliyev tərəfindən şəhidlərin xatirəsinə göstərilən ehtiramın, qazilərə göstrilən yüksək qiqqətin növbəti sübutudur. Eyni zamanda onu da deyim ki, Azərbaycan Ordusu Vətən müharibəsindəki qələbəsi ilə şəhidlərin ruhunu şad etdi”.
Onun sözlərinə görə, bu Parkın yeni bulvarda açılması Azərbaycanın müasır, mədəni və yerləşdiyi regionun ən güclü dövləti olmasının da bir nümunəsidir: “Onu da deyim ki, Hərbi Qənimətlər Parkında nümayiş olunanlar 44 günlük müharibə zamanı ermənilərdən ələ keçirilən hərbi silah və texnikanın sadəcə kiçik bir hissəsidir. Lakin bu hissə belə dünya hərb tarixi baxımından Ermənistanın hansı bir acınacaqlı məğlubiyyətə düçar olmasını sərgilyir. Elə açılışdakı nitqində bu məqama toxunan cənab İlham Əliyev, “Düşmənin nümayiş etdirilən dağıdılmış və qənimət kimi götürülmüş texnikası bir daha bizim gücümüzü, düşmənin məğlubiyyətini göstərir” deyib. Vətən müharibəsinin böyüklüyü həm də ondadır ki, 44 gün ərzində Azərbaycan ordusu hər zaman hücuma keçib, Ermənistan ordusu isə geri çəkilərək qaçıb”.
Açıqlamasında Azərbaycan Prezidentinin açılış nitqindəki digər məqamlara da toxunan Yücel Karauz deyib ki, İlham Əliyev Dağlıq Qarabağ münaqişəsinin yaranma tarixi, sonrakı inkişafı, Xocalı faciəsinin törədilməsində 366-cı motoatıcı alayın iştirakı, ötən müddət ərzində bu münaqişənin həlli istiqamətində aparılan danışıqlar, o cümlədən ölkənin iqtisadi inkişafı, xarici siyasət və ordu quruculuğu sahəsində atılan önəmli addımlar barədə geniş və ətraflı danışdı: “Bu məqamda xüsusi olaraq vurğulamağı özümə borc bilirəm ki, Azərbaycanın Vətən müharibəsində qələbə əldə etməsində Prezident İlham Əliyevin rəhbərliyi ilə 17 il ərzində ordu quruculuğu sahəsində atılan addımlar mühüm rol oynadı. Bu 17 il ərzində ordu quruculuğuna dövlət tərəfindən göstərilən diqqət nəticəsində Azərbaycan Silahlı Qüvvələri dünya miqyasında 50 ən güclü ordu sırasındadır”.
“Hərbi Qənimətlər Parkını gəzərkən cənab Prezident, Ali Baş Komandan İlham Əliyevin xüsusilə Rusiya tərəfindən başqa bir ölkəyə verilməyən “İskəndər-M” raketi ilə bağlı dediyi “Şuşanı, bax, bu “İskəndər-M” raketləri ilə ermənilər atəşə tutmuşdular. Haradandır bu raketlər Ermənistan ordusunda? Bu raketlər olmamalı idi. Artıq bu, əyani sübutdur. Ermənistanın hərbi cinayətinin sübutudur və biz cavab istəyirik. Bu ölümcül silah Ermənistanın əlinə necə düşdü? Hələ ki, cavab ala bilməmişik. Amma alacağıq. Hər kəs gəlsin, görsün, Şuşanı, bizim qədim şəhərimizi Ermənistan “İskəndər-M” raketləri ilə məhv etməyə çalışırdı. Şuşanı biz azad edəndən sonra bundan istifadə etdilər. Bizdə kifayət qədər məlumat var. Sadəcə olaraq, biz rəsmi açıqlama gözləyirik. Hər kəs gəlib bunu görəcək. Bu, erməni vəhşiliyinin, hərbi cinayətin növbəti əyani sübutudur” sözlərinin önəmini xüsusi olaraq vurğulamaq istəyirəm. Eyni zamanda demək istəyirəm ki, “Güclü Ali Baş Komandan – güclü dövlət – güclü xalq – güclü silahlı qüvvələr vəhdəti Vətən müharibəsindəki Zəfəri təmin etdi”, – deyə Türkiyəli general sonda vurğulayıb.
