Bayraqdar.info – Azərbaycanda və ondan kənarda karikatura sənətinə verməkdə olduğu töhfələrlə daim diqqət mərkəzində olan tanınmış karikatura ustası Seyran Cəfərli bu dəfə də İranda keçirilmiş 3-cü Beynəlxalq “ARTOONIST” Mövsümi Karikatura Festivalı – Qış 2021 yarışmasında 1-ci yerə layiq görülüb.
Bayraqdar.info bu xəbəri karikaturaçının özündən alıb.
Bu, Seyran Cəfərlinin ilk uğuru deyil. Ümumiyyətlə o, demək olar ki, hər ay beynəlxalq səviyyədə hansısa uğuruyla bizi sevindirir. Bir çox beynəlxalq yarışmalarda şəxsən iştirak edib qələbə qazanmaqla bərabər münsiflər heyətində də təmsil olunur. Onun bu qəbildən olan ən son uğurları arasında Suriya Karikatura Yarışması 2021 və ABŞ-da Sağlamlığı İnkişaf Etdirən Sənətçilər Beynəlxalq Karikatura Yarışması 2021-də münsiflər heyəti tərkibində yer almasıdır.
Xatırladaq ki, Seyran Cəfərli Türkiyədə keçirilən İzmir Böyük Şəhər Bələdiyyəsi Beynəlxalq Karikatura Yarışması 2021-də 1-ci yerə, Polşada keçirilən Beynəlxalq Sərgi Satirikon 2021-də isə xüsusi mükafata layiq görülüb. İzmirdəki qələbəsi sonucu onun karikaturası şəhərin avtobuslarının üzərində də sərgilənmişdi.
Hər il olduğu kimi bu il də karikatura sahəsində ölkəmizi layiqincə təmsil edən Seyran Cəfərli ümumi hesabla beynəlxalq karikatura yarışlarında 160-dan çox mükafat qazanıb, 50-dən çox yarışmada münsiflər heyətinin üzvü olub.
