Bayraqdar.info – Şəhid ailəsi üzvlərinin və müharibə iştirakçılarının məşğulluğunun təminatına əməkhaqlarının birgə maliyyələşdirilməsi Proqramı çərçivəsində də dəstək göstərilir. Əmək və Əhalinin Sosial Müdafiəsi Nazirliyinin tabeliyindəki Dövlət Məşğulluq Agentiyi tərəfindən həmin proqram çərçivəsində işəgötürənlərlə bağlanmış müqavilələr əsasında artıq 378 şəxsə işlə təmin edilmək üçün göndəriş verilib. Nazirliyin İctimaiyyətlə əlaqələr və kommunikasiya şöbəsindən verilən məlumata əsasən onların böyük hissəsi ilə qısa müddətdə əmək müqaviləsi bağlanıb. Proqram üzrə işlə təmin olunanların bir hissəsi də Vətən müharibəsi şəhidlərinin ailə üzvləri və həmin müharibənin iştirakçılarıdır.
Məlumatda bildirlir ki, əməkhaqlarının birgə maliyyələşdirilməsi Proqramına qoşulmaq üçün artıq 114 işəgötürən müraciət edib. “Məşğulluq” altsisteminə vakansiyalar yerləşdirən, müəyyən edilmiş prioritet iqtisadi sahələr üzrə vakansiyası olan həmin işəgötürənlərlə müqavilələrin imzalanması, göndəriş verilmiş şəxslərlə əmək müqavilələrinin bağlanması prosesi davam edir. Bu proqram əsasında göndəriş verilmiş və işəgötürənlər tərəfindən işlə təmin edilmiş şəxslərin əməkhaqlarının bir hissəsi Dövlət Məşğulluq Agentliyi tərəfindən maliyyələşdirilir.
