Son yeniləmə: 30 Mart 2021 11:06
Bayraqdar.info – İctimai-Siyasi Proseslərin Beynəlxalq Araşdırmalar Mərkəzindən (İSBAM) verilən xəbərə görə, 29 mart 2021-ci il tarixində qardaş Türkiyə Cümhuriyyətinin İstanbul şəhərində keçirilmiş təqdimat mərasimində hər iki ölkənin ictimai siyasi xadimləri, elm və mədəniyyət insanları iştirak edib. İki qardaş ölkənin himnlərinin oxunması ilə başlayan tədbirdə Azərbaycan və Türkiyənin müstəqilliyi və ərazi bütövlüyü uğrunda canından keçən şəhidlər üçün sayğı duruşu edilib. Tədbir Qarabağ savaşında fərqlənmiş jurnalistlərin təltif edilməsinə həsr olunub.
Jurnalist Səidə Ömərin aparıcılığıyla keçirilən tədbirdə çıxış edən İSBAM sədri Samir Adıgözəlli bildirib ki, “bu mükafatın təsis edilməsindəki əsas məqsəd II Qarabağ savaşında informasiya müharibəsində fəal iştirak edən media nümayəndələrinin zəhmətini bir balaca da olsun dəyərləndirməkdir”.
Əvvəlcə bu mükafatın savaş əsnasında Qarabağ bölgəsində fəaliyyət göstərən media işçilərinə verildiyini qeyd edən təşkilat sədri bundan sonra informasiya savaşında xalqımızın, dövlətimizin və millətimizin yanında olan digər xarici ölkə media nümayəndələrinin də mükafatlandırılacağını xüsusi ilə vurğulayıb.
Bundan sonra çıxış edən İSBAM idarə heyətinin üzvü, Qarabağ qazisi Şöhrət Eyvazov müharibənin qazanılmasında əməyi keçən hər kəsi, başda müzəffər Ali Baş Komandan İlham Əliyev olmaqla şanlı Azərbaycan ordusunun əsgər və zabitlərini təbrik edərək bu media ödülünün verilməsinin simvolik xarakter daşıdığını qeyd edib. O, bu zəfərin Azərbaycan-Türkiyə mediasının qarşılıqlı əməkdaşlığı üçün böyük perspektivlər açdığını vurğulayıb.
Mükafatlandırılan Türkiyə jurnalistləri adından çıxış edən CNN TÜRK telekanalının aparıcısı Fulya Öztürk o faciə və qürurla dolu anları unutmağın əsla mümkün olmadığını bildirib. Jurnalist bildirib ki, bu gün keçirilən tədbirdə aldığı mükafat fəaliyyəti boyu aldığı ən müqəddəs mükafatıdır, çünki həmin mükafat əziz şəhidlərimizin qələbəsinin, zəfərinin nəticəsidir.
Sonra mükafatın təqdimetmə mərasimi keçirilib. Mərasimdə mükafat alan jurnalistlərin hər biri bu mükafatın ali dəyərinə toxunaraq zəfərdə kiçicik də olsa paylarının olmasından dolayı məmnunluq hissi keçirdiklərini bildiriblər.
Qeyd edək ki, tədbir Azərçayın və Sirabın dəstəyi ilə baş tutub. Tədbirdə Azərbaycanın İstanbuldakı Baş konsulluğunun konsulu Zaur Allahverdizadə iştirak edib.
