Son yeniləmə: 30 Mart 2021 14:57
Bayraqdar.info – “İran şirkətləri azad edilmiş ərazilərin minalardan təmizlənməsi və yenidənqurma işlərində iştirak etməyə hazırdır.”
Azərbaycan Respublikası Xarici İşlər Nazirliyinin Mətbuat xidməti idarəsindən verilən məlumata görə, bu barədə bu gün Azərbaycanın xarici işlər naziri Ceyhun Bayramovla görüşündə İran İslam Respublikasının xarici işlər naziri Məhəmməd Cavad Zərif deyib. Düşənbə şəhərində keçirilən “Asiyanın ürəyi – İstanbul prosesi” 9-cu Nazirlər Konfransı çərçivəsində baş tutan görüşdə nazirlər Azərbaycan və İran arasında mövcud olan ikitərəfli əməkdaşlıq münasibətlərinə dair məsələlər ətrafında fikir mübadiləsi aparıblar.
Tərəflər Azərbaycan Respublikası ilə İran İslam Respublikası arasında iqtisadi, ticarət və humanitar sahələr üzrə Dövlət Komissiyasının cari ildə keçirilmiş sonuncu iclasının nəticələrini yüksək qiymətləndiriblər. Nazirlər, həmçinin regional təhlükəsizlik məsələləri, xüsusilə də 44 günlük Vətən Müharibəsindən sonra bölgədə mövcud olan vəziyyət, imzalanmış üçtərəfli bəyanatların icrası ilə bağlı məsələləri müzakirə ediblər. Görüşdə tərəflər, həmçinin qarşılıqlı maraq doğuran digər məsələlər ətrafında fikir mübadiləsi aparıblar.
Qeyd edək ki, Azərbaycanın Xarici işlər naziri bu görüşlə bağlı tvitində onu “məhsuldar fikir mübadiləsi” adlandırıb.
Had a fruitful exchange of views with my colleague from #Iran @JZarif in Dushanbe.
Discussed bilateral cooperation agenda, as well as regional security issues and reconstruction and restoration work to be implemented in the liberated territories of #Azerbaijan. pic.twitter.com/5XwoiELpmZ
— Jeyhun Bayramov (@bayramov_jeyhun) March 30, 2021
