Bayraqdar.info – Özbəkistan Prezidenti Şavkat Mirziyoyevin imzaladığı yeni qanunla bu ölkə latın əlifbasına keçidi sürətləndirir. Martın 16-da imzalanmış “Latın qrafikasına əsaslanan özbək əlifbasının icra edilməsi haqqında” qanunla yeni layihə müzakirəyə çıxarılıb. 28 hərf və bir hərf birləşməsindən ibarət olan yeni əlifba bu il martın 31-dək müzakirə və qəbul ediləcək.
Qeyd edək ki, hazırda mövcud olan layihə ilə qəbul ediləcək layihə arasında ortaq türk əlifbası baxımından gərəkli dəyişikliklər olacaq. Belə ki, mövcud layihədə “ç”, “ş”, “ö” və “ğ” hərfləri uyğun olaraq “ch”, “sh”, “o`” və “g`” kimi təqdim edilirdisə, dəyişiklik qəbul edildikdən sonra bu hərflər digər türk dillərində, o cümlədən Azərbaycan dilində olduğu kimi təqdim ediləcək.
Layihədə yalnız bir hərf birləşməsi qalacaq. Bu da “sağır nun” dediyimiz səsin “ng” şəklində təqdim edilməsidir.
Özbəkistan layihənin sonuncu variantını təsdiq etdikdən sonra 2023-cü ilin 1 yanvar tarixinə tam olaraq latın qrafikalı özbək əlifbasına keçəcək.
Onu da əlavə edək ki, türk dövlətlərindən Türkiyə uzun illərdir latın əlifbasından istifadə etsə də digər türk dövlətləri prosesi 1991-ci ildə müstəqillik qazandıqdan sonra bərpa edə bilib. Türkmənistan və Azərbaycan artıq tam olaraq latın əlifbasına keçib. Qazaxıstan da prosesi 2025-ci ildə bitirməyə hazırlaşır. Yalnız Qırğızıstan hələ ki, bu yöndə ciddi addımlar atmağa tələsmir.
